Cerita Bahasa Jawa "Legenda Petanahan Kebumen"

Nalika semana ana ing iring Gunung Slamet, ana kadipaten Pucang Kembar. Sang Adipati asma raden Citra Kusuma kang kagunga putri aran Dewi Sulastri. Dewi Sulastri banget sulistyo ing warna mula akeh jejaka kang pengena nglamar dadi garwane.

Adipati Bulupitu asma Raden Jaka Puring kepingin mundhut garwa Dewi Sulastri. Mula Jaka Puring ngaturake panglamar marang Adipati Citra Kusuma lan panglamare ditampa amarga Jaka Puring kondang sakti mandraguna. Dadi amung ngawekani krodane Jaka Puring. Wondene Dewi Sulastri mangu-mangu atur wangsulan marang kanjeng ramane amarga wis nduweni pilihan jejaka kang dadi wataganti asma Raden Jono, lan maneh ora tresna marang jaka puring awit rupane elek lan nduweni cacad.

Raden Jono bareng krungu Dewi Sulastri dilamar Jaka Puring banget muntabe lan banjur ngaturake panglamar marang SANG Adipati Citra Kusuma. Panglamare ditampa lamun bisa ngadahake krodhane Jaka Puring. Raden Jono nyaguhi.

Sawise nglamar ditampa, Jaka puring ngajak Dewi Sulastri menyang kadipaten Bulupitu. Raden Jono banjur nututi jengkare Jaka Puring lan bisa ketemu. Nalika Jaka Puring lagi ngaso sinambi nguyang jaran mula papan kono dijenengi Guyangan.

Jaka Puring saprajurite kasorah, perange banjur mlayu ngidul. Ing papan kono Jaka Puring sakbalane pada ngaso sawetara. Prajurite akeh sing pada nandang tatu lan ana uga sing tiwas. Prajurit sing pada tatu lan tiwas banjur didusi ngamgo banyu sumur, anehe sing tatu pada mari lan sing tiwas pada urip. Mula papan kono dijenengi Padha urip.

Raden Jono sabalane nututi ngidul, campuhe prajurit banjur perang rame lan pada dene sayahe nganti pet-petan meh semaput, mula papan kono dijenengi Petanahan. Jaka Puring sabalane mlayu ngidul maneh. Raden Jono nututi nanging kelangan lacak satemah atine monga-mungu apa arep diterusake apa ora. Mula papan kono dijenengi Munggu.

Jaka Puring mlayu ngidul maneh mlebu alas gadung. Prajurit pada kasrimpet-srimpet wit gadung. Mula papan kono dijenengi Karang Gadung. Jaka Puring mbacutake playune menyang pesisir. Ing kono Dewi Sulastri disingitake lan dierut ana grumbulan wit pandan kang godhonge kuning. Mula papan kono dijenengi Pandhan Kuning.

Ana grumbulan pndhan kuning Dewi Sulastri bisa direbut dening Raden Jono. Raden Jono terus ngoyak Jaka Puring ngajab patine kareban bisa ilang klilipe.

Jaka Puring mlayu ngalor ngulon mlebu desa sing wargane wis pada reja. Mula papan kono dijenengi Karangreja. Saka Karangreja Jaka Puring mlayu mangulon terus dioyak dening Raden Jono sabalane. Amarga perangane anane mung wong tuwa pada buron, mula papan kono dijenengi Tuwaburu.

Prajurit Jaka Puring wis kaenteken tenaga,atine nglokro lan maras atine ngadephi wadya balane Jono kang semangate ngendab-endabi. Amargi prajurit pada maras atine mula papan kono dijenengi Moros. Jaka Puring ngelam-elami prajurit satemah tuwuh maneh semangate. Ana ing satengahing marga nemokake kali cilik kang banyune mili ora tau asat. Wong kono ngarani criwikan. Prajurit Jaka Puring pada raup lan adu sana criwikan, mula papan kono dijenengi Criwik.

Sacedhake Criwik wong-wong pada kepenak utawa mulya uripe dadi petani tambak, mula papan kono dijenengi Tambak Mulyo. Jaka Puring terus mlayu ngulon keparan gunung karang. Kanthi kasektane Jaka Puring nabrak karang nganti bolong, mula papan kono dijenengi Karang Bolong.

Jaka Puring terus dioyak dening Raden Jono wusana nyebur kali. Ana kali kasebut Jaka Puring ditamani pusaka Bungkul Kencana dening Raden Jono. Wusanane Jaka Puring sirna salah kedadean malih dadi baya, mula papan kono dijenengi Buayan. Manut critane wong-wong sakupenge telatah kono terkadang ana kang diweruhi siluman baya putih.

Categories: CERITAKU, KARYA